- જયદીપ અહલાવત ફિલ્મમાં કરીનાના પાડોશી અને ગણિતના શિક્ષકના રોલમાં છે.
- આ ફિલ્મ જાપાની નોવેલ ધ ડિવોશન ઓફ સસ્પેક્ટ એક્સનું રૂપાંતરણ છે.
- ફિલ્મમાં દરેક કલાકારે સારો અભિનય કર્યો છે.
એક્ટર– કરીના કપૂર, જયદીપ અહલાવત, વિજય વર્મા
ડાયરેક્ટર– સુજોય ઘોષ
શ્રેણી– હિન્દી, ક્રાઈમ, થ્રિલર, ડ્રામા
સમય– 2 કલાક 2 મિનિટ
રેટિંગ– 3/5
જાને જાનની વાર્તા
જાને જાન એક ક્રાઈમ થ્રિલર ફિલ્મ છે, જેની વાર્તાના કેંદ્રમાં સિંગલ મધર અને તેની દીકરી છે. બંને એક મર્ડર મિસ્ટ્રીમાં ગૂંચવાઈ જાય છે. પોલીસની તપાસ ચાલી રહી છે. આ દરમિયાન તેમને પોતાના પાડોશીના રૂપમાં એક સહયોગી મળે છે. તે એક સાધારણ પણ જિનિયસ ટીચર છે. સિંગલ મધર માયા ડિસૂઝા (કરીના કપૂર) હત્યાની તપાસના કેસમાં ગૂંચવાઈ ગઈ છે. પૂર્વ પતિ અજીત મ્હાત્રે (સૌરભ સચદેવા)એ તેની સાથે ઘરેલુ હિંસા આચરી હતી અને હવે અજીતની હત્યા થઈ ગઈ છે.
માયા આ કેસમાં મુખ્ય અને એકમાત્ર શકમંદ છે. તેનો પાડોશી નરેન (જયદીપ અહલાવત) મેથ્યસનો જિનિયસ છે. તે માયાની મદદ કરે છે કારણકે એક જિદ્દી ઈન્સ્પેક્ટર કરણ આનંદ (વિજય વર્મા) આ કેસના મૂળ સુધી પહોંચવા માગે છે. શું માયા પોતાને બચાવી શકશે કે પકડાઈ જશે? આ કારણે શું પોતાની દીકરી તારા (નાયશા ખન્ના)ને ગુમાવી દેશે? ફિલ્મની વાર્તા આ જ સવાલોના જવાબ શોધે છે.
રિવ્યૂ
સુજોય ઘોષની આ ફિલ્મ જાપાની નોવેલ ધ ડિવોશન ઓફ સસ્પેક્ટ એક્સનું રૂપાંતરણ છે. આ નોવેલ કીગો હિગાશિનોએ લખી છે. સુજોય ઘોષની આ ક્રાઈમ-થ્રિલરને હત્યારાની ઓળખ કરવા માટે નહીં પરંતુ અપરાધી પોલીસને કઈ રીતે ગેરમાર્ગે દોરી શકે એ દર્શાવામાં આવ્યું છે. અજીતની હત્યા થાય છે ત્યારે શંકાની સોય માયા તરફ જાય છે. સુજોય અને કો-રાઈટર રાજ વસંત વાર્તામાં તણાવ પેદા કરવાની કોશિશ કરે છે અને તેમાં સફળ પણ રહે છે. વાર્તા જેમ-જેમ આગળ વધે છે તેમ સ્પષ્ટ થાય છે કે, આ મર્ડર કેસ ઉપરથી દેખાય છે તેના કરતાં ઘણો વધુ ઊંડો છે. જોકે, પ્લોટમાં નાખવામાં આવેલા ટ્વિસ્ટ રોમાંચ વધારે છે.
ફિલ્મમાં કેટલીક ખામીઓ પણ છે. દાખલા તરીકે કાર્યવાહી કરતી વખતે કરણ માયા પર જલ્દી શંકા કરી લે છે. પુરાવા પણ તેને ઝડપથી મળી જાય છે. એવા કેટલાય સવાલો છે જેના જવાબ મળતા નથી. ક્રાઈમ થ્રિલર હોવા ઉપરાંત જાને જાન પ્રેમમાં બલિદાન અને જૂનૂન વચ્ચેની પાતળી રેખાને દર્શાવે છે. સિનેમેટોગ્રાફર અવિક મુખોપાધ્યાયે કલિમ્પોંગના માહોલને કેમેરામાં બખૂબી કેદ કર્યો છે. જયદીપ અહલાવતે અજીબ પ્રતિભાવાળા અને પ્રેમમાં પાગલ વ્યક્તિના રૂપમાં સારો અભિનય કર્યો છે. નિરાશા, લાચારી કે દ્રઢ સંકલ્પ, જયદીપે દરેક સીનમાં પોતાનું શ્રેષ્ઠ આપ્યું છે. જયદીપે આત્મવિશ્વાસ સાથે પાત્ર ભજવ્યું છે. ક્લાઈમેક્સમાં તે જબરદસ્ત લાગે છે.
કરીના કપૂર પણ દરેક સીનમાં ઊભરી આવી છે. ઈમોશનલ સીન્સથી લઈને ડર, ગુસ્સા સહિતના દરેક ભાવને તેણે સરસ રીતે દર્શાવ્યો છે. વિજય વર્માએ પણ જિદ્દી પોલીસવાળાના રોલમાં પોતાની ક્ષમતાઓનું પ્રદર્શન કર્યું છે. બંને કો-સ્ટાર સાથે તેની કેમેસ્ટ્રી સારી દેખાય છે. જાને જાન હાઈસ્પીડ થ્રિલરના ઢાંચામાં બંધ નથી બેસતી. ફિલ્મની વાર્તા ગોઠવાવામાં સમય લાગે છે. ક્યારેક વાર્તાની પકડ છૂટી જાય છે પણ સુંદર વિઝ્યુઅલ્સ ધ્યાન ખેંચે છે.
કેમ જોવી?
જો તમને ક્રાઈમ થ્રિલર જોવી ગમતી હોય અને કંઈક એવું જોવા માગતા હો જે રહસ્યમયી હોય તેમજ તમને વિચારવાનો મોકો પણ આપે તો તમે આ ફિલ્મ જોઈ શકો છો. જોકે પુસ્તકમાં વાર્તાની જે ગતિ છે તે સુજોય ઘોષ ફિલ્મમાં પકડી નથી શક્યા.
